pubblicato su "Dromos 2000", catalogo promozionale della segreteria artistica "Applausi" (Oristano, Sardinia)

Giacomo Serreli

Nd'est bessida a campu betzi tres annos como, ma su prozetu artisticu ligadu a custa cantante de s'Alighera, cun d-una ammescuránsia in ballallara tra su connotu catalanu e carchi frina de jazz, at agatadu oe su cumprimentu beru sou.
Est unu ponte ideale tra sas diversas culturas de su Mediterraneu chi impreat che denominadore comunu sa limba de s'Alighera. Est una coghera vitale de sonos chi da s'universu de sa catalanidade si pesat a bolu pro  si che imbergher poscas in abas a curtzu de su fado o in sas profundidades de s'anima barbaricina.
Unu biazu chi abaidat a cara a mare in ue sas interpretassiones, de testos de varios poetes catalanos, nos zughen in sas alas de sa poesia e in modu tantu prus bivu prommores de su timbru de sa boghe sua límpia e pura.
Unu resurtadu aberu arrefinadu inue faghen puru sa parte issoro sos arrangiamentos medidos de Mark Harris e su trabagliu isparimentadu de sos musitzistas chi acumpanzan sa cantante.